Ekskluzive | Digjet Audi Q8 i një avokati në Vushtrri, zjarri përfshin edhe veturën e vëllait – dëmi rreth 70 mijë euro

Një automjet luksoz Audi Q8, në pronësi të një avokati nga Vushtrria, është përfshirë nga flakët në orët e para të mëngjesit, ndërsa zjarri ka përfshirë edhe një veturë tjetër të parkuar pranë tij, raporton Sinjali.

Sinjali mëson ekskluzivisht se pronar i automjetit është Kastriot Feka, 34-vjeçar, avokat dhe pronar i zyrës “Feka & Partners Law L.L.C.”.

Sipas burimeve të Sinjalit, ngjarja ka ndodhur rreth orës 01:20, në rrugën “Avni Feka”, në fshatin Begaj të Vushtrrisë.

Kur njësitë policore kanë mbërritur në vendin e ngjarjes, kanë konstatuar se Audi Q8 ishte përfshirë nga zjarri në pjesën e përparme, ndërsa flakët kishin kapluar edhe një Opel, në pronësi të vëllait të avokatit, i cili ishte i parkuar pranë.

Zjarrfikësit kanë lokalizuar dhe shuar zjarrin, por dëmet në automjete janë të konsiderueshme.

Burimet e Sinjalit bëjnë të ditur se dëmi vetëm në automjetin Audi Q8 vlerësohet në rreth 70 mijë euro.

Siç mëson Sinjali, gjatë deklarimit para hetuesve, avokati ka thënë se nuk dyshon në ndonjë person konkret dhe se nuk ka informacione që ngjarja mund të lidhet me ushtrimin e profesionit të tij.

Në vendin e ngjarjes kanë dalë hetuesit, krimteknikët dhe është intervistuar edhe një dëshmitar. Me urdhër të Prokurorit të Shtetit, rasti është iniciuar si “Zjarrvënie”, ndërsa është urdhëruar edhe angazhimi i ekspertit të pavarur të zjarrit për të përcaktuar shkakun e shpërthimit të flakëve.

Hetimet janë në vazhdim dhe autoritetet po punojnë për të sqaruar nëse bëhet fjalë për zjarrvënie të qëllimshme apo për ndonjë shkak tjetër.