Bari jetik ende mungon – shqetësime serioze për trajtimin e pacientëve me kancer në Kosovë

Mungesa e barit Palbociclib, i cili përdoret në trajtimin e pacientëve me kancer, po vazhdon të ngjallë shqetësime, pasi sipas pretendimeve të bëra publike, ky medikament mungon në institucionet publike shëndetësore që nga muaji maj.

Sipas reagimit, pacientët dhe familjarët e tyre po përballen me vështirësi serioze në sigurimin e terapisë, ndërsa thuhet se kostoja e këtij bari në tregun privat arrin deri në 800 euro, çmim që për shumë familje është i papërballueshëm.

Në reagim theksohet se problemi nuk lidhet me mungesën e fondeve, por me vonesat në furnizim, duke u bërë thirrje institucioneve përgjegjëse që të ndërmarrin masa urgjente.“Pacientëve me kancer dhe familjeve të tyre nuk u intereson nëse ka dështuar tenderi apo nëse ka probleme administrative. Ata kanë nevojë për trajtim.”

Më tej thuhet se personat që kanë përjetuar nga afër betejën me kancerin e dinë rëndësinë e vazhdimësisë së terapisë dhe pasojat që mund të sjellë mungesa e barnave esenciale.

Autori i reagimit u bën thirrje institucioneve kompetente të përmbushin obligimet ligjore ndaj pacientëve.“Kryeni përgjegjësitë që i keni. Dërgojuni pacientëve barnat që jeni të obliguar t’ua siguroni. Nuk ka nevojë askush të luajë rolin e të mirit apo të të keqit. Secili ta kryejë punën e vet.”

Për transparencë, në reagim theksohet se mungesa e barit është rikonfirmuar nga burime brenda Shërbimit Spitalor dhe Klinik Universitar të Kosovës (SHSKUK) rreth orës 09:10, duke shtuar se situata mund të ketë ndryshuar pas atij momenti.

Deri në publikimin e këtij lajmi, institucionet përgjegjëse nuk kanë dalë me një sqarim zyrtar lidhur me pretendimet për mungesën e barit Palbociclibapo për afatet e mundshme të furnizimit të ri.