U arrestua në Aeroportin e Prishtinës, ky është i dyshuari që kanosi Xhelal Sveçlën

Sipas burimeve të Sinjalit, i arrestuari është Remzi Hajzeraj, rreth 43 vjeç, i cili u ndalua më 7 korrik, rreth orës 14:40, nga zyrtarët policorë në aeroport.

Sipas të njëjtave burime, Hajzeraj kërkohej në kuadër të hetimeve për veprën penale “Kanosje”, në lidhje me një rast të regjistruar më 9 nëntor 2025.

Dyshohet se ai, përmes një publikimi në rrjetin social Facebook, kishte kanosur ministrin e Punëve të Brendshme të Republikës së Kosovës, Xhelal Sveçla.

Pas arrestimit, i dyshuari është shoqëruar në stacionin policor, ku janë kryer procedurat e nevojshme hetimore.

Me vendim të Prokurorit të Shtetit nga Prokuroria Themelore në Prishtinë – Departamenti i Përgjithshëm, ndaj tij është caktuar masa e ndalimit prej 48 orësh.

Autoritetet pritet të vazhdojnë procedurat hetimore për zbardhjen e plotë të rastit, ndërsa pas skadimit të masës së ndalimit, prokuroria do të vendosë për hapat e mëtejshëm procedurorë.

Në përputhje me parimin e prezumimit të pafajësisë, personi i arrestuar konsiderohet i pafajshëm derisa fajësia e tij të provohet me vendim të formës së prerë nga gjykata.