Tragjedi për Vushtrrinë: Dy nga tre vushtrriasit e zhdukur gjenden të vdekur në lumin Lepenec

Një ngjarje e rëndë ka tronditur Vushtrrinë dhe mbarë Kosovën, pasi dy nga tre shtetasit e Kosovës të raportuar si të zhdukur janë gjetur pa shenja jete në lumin Lepenec, ndërsa personi i tretë vazhdon të jetë i zhdukur.

Më herët gjatë ditës ishte raportuar zhdukja e Ejup Tërnavës, Cennet Tërnavës dhe Fatmire Shabanit, të cilët ishin parë për herë të fundit mbrëmjen e kaluar, rreth orës 22:00, në Shkup.

Sipas informacioneve të para, ata ishin nisur nga aeroporti drejt Kosovës me një veturë Mercedes GLC me ngjyrë blu, me targa MR-DT 2025, por që nga ajo kohë ishte humbur çdo kontakt me ta.

Pas një operacioni kërkimi, dy prej të zhdukurve janë gjetur pa shenja jete në lumin Lepenec, ndërsa kërkimet për personin e tretë po vazhdojnë. Autoritetet kompetente janë në terren dhe po zhvillojnë hetime për të sqaruar rrethanat e kësaj tragjedie.

Pamje nga lumi Lepenec, ku po zhvillohet operacioni i kërkimit, janë publikuar nga portali lokal “Kaçaniku me rrethinë”.