Përgjaket Ferizaj, një person sulmon me thikë qytetarët

Në Ferizaj dita ka nisur me një ngjarje kriminale. Një person ka sulmuar qytetarët me thikë në afërsi të postës së qytetit. Për pasojë dy persona janë plagosur.

Burime të Indeksonline bëjnë të ditur se sulmuesi ka të ngjarë të jetë me të meta psiqike. Rastin e ka konfirmuar edhe Policia e Kosovës për Indeksonlinen.

“Sot, rreth orës 07:50, kemi pranuar informatën se në rrugën “Dëshmorët e Kombit”, në afërsi të postës qendrore në Ferizaj, ka ndodhur një incident, ku një person dyshohet se ka sulmuar dy persona me mjet të mprehtë (thikë), të cilët janë transportuar për trajtim mjekësor në Emergjencën e Ferizajt, pasi kanë marrë ndihmën e parë në vendin e ngjarjes nga ekipet mjekësore. I dyshuari është larguar nga vendi i ngjarjes në drejtim të panjohur. Njësitë policore kanë dalë në vendin e ngjarjes dhe janë duke ndërmarrë veprime intensive hetimore për identifikimin dhe arrestimin e të dyshuarit, si dhe për sqarimin e plotë të rrethanave të rastit”, ka thënë Kanun Veseli për Indeksonlinen.