Ekskluzive | Zhduket 13-vjeçarja nga një strehimore në Prishtinë – dyshohet se doli nga dera me defekt

Një 13-vjeçare është raportuar e zhdukur pasi është larguar nga një strehimore në Prishtinë, ndërsa Policia ka nisur kërkimet për lokalizimin e saj, raporton Sinjali.

Sinjali mëson ekskluzivisht se bëhet fjalë për një të mitur rreth 13-vjeçare, identiteti i së cilës nuk publikohet për shkak të moshës.

Sipas burimeve të Sinjalit, rasti është raportuar më 17 korrik, rreth orës 18:00, në rrugën ( për shkak të ndjeshmërisë së lokacionit, Sinjali nuk e publikon) në Prishtinë.

Burimet thonë se përgjegjësja e strehimores ka deklaruar se rreth orës 15:30 e mitura kishte dalë në oborrin e qendrës, ndërsa rreth 20 minuta më vonë ishte vërejtur se nuk ndodhej më në objekt.

Dyshohet se vajza është larguar përmes derës kryesore të hyrje-daljes, e cila, sipas përgjegjëses së qendrës, kishte pasur probleme teknike dhe mund të ketë mbetur e hapur.

Në vendin e ngjarjes kanë dalë njësitë policore dhe hetuesit, ndërsa janë njoftuar edhe Qendra për Punë Sociale dhe nëna e të miturës, e cila ka deklaruar se vajza nuk është kthyer në shtëpi.

Me udhëzim të Prokurorit për të Mitur, rasti është iniciuar si “Person i zhdukur”, ndërsa Policia po vazhdon kërkimet për gjetjen e 13-vjeçares.