E plagosi sot gruan me thikë, Policia në kërkim të tij

Një ngjarje e rëndë e dhunës në familje ka ndodhur në orët e para të mëngjesit në Durrës, ku një grua 32-vjeçare ka mbetur e plagosur pasi dyshohet se është sulmuar me thikë nga bashkëshorti i saj.

Sipas informacioneve paraprake, ngjarja është regjistruar në lagjen nr. 16/1, pas një konflikti që dyshohet se ka ndodhur brenda banesës së çiftit.

Policia e Shtetit njofton se i dyshuari është Xhoni Karaj, 40 vjeç, i cili dyshohet se, pas një mosmarrëveshjeje për motive të dobëta, ka goditur me mjet prerës bashkëshorten e tij, E. K., 32 vjeçe.

Menjëherë pas incidentit, e plagosura është transportuar me urgjencë në spital, ku po merr trajtim mjekësor dhe ndodhet nën kujdesin e ekipit shëndetësor. Deri më tani nuk janë bërë të ditura detaje zyrtare mbi gjendjen e saj shëndetësore.

Pas ngjarjes, autori i dyshuar është larguar nga vendi i ngjarjes. Policia ka shpallur në kërkim 40-vjeçarin dhe ka nisur kontrolle intensive për lokalizimin dhe arrestimin e tij.

Në vendin e ngjarjes kanë ndërhyrë specialistët e hetimit, të cilët kanë kryer këqyrjen e zonës dhe kanë mbledhur provat materiale që do t’i shërbejnë zbardhjes së plotë të rastit.

Grupi hetimor, në drejtimin e Prokurorisë kompetente, po vijon veprimet procedurale për dokumentimin e ngjarjes, përcaktimin e dinamikës së konfliktit dhe sqarimin e motiveve që çuan në këtë akt të rëndë.

Autoritetet u kanë bërë thirrje qytetarëve që, nëse kanë informacione mbi vendndodhjen e personit të kërkuar, t’i raportojnë ato tek organet e rendit.

Personi i dyshuar prezumohet i pafajshëm derisa fajësia e tij të provohet me vendim të formës së prerë nga gjykata.