E spiunoi tek babai se pinte hashash! 16 vjeçari e therr axhën me thikë

Një konflikt familjar ka përfunduar me plagosje në Kamëz, ku një 16-vjeçar dyshohet se ka goditur me thikë xhaxhain e tij pas një mosmarrëveshjeje.

Sipas informacioneve paraprake, ngjarja ka ndodhur mbrëmjen e së martës, ndërsa pas njoftimit për incidentin, në vendin e ngjarjes kanë ndërhyrë forcat e Policisë.

I mituri është shoqëruar dhe më pas arrestuar nga autoritetet, ndërsa i plagosuri ka marrë ndihmën e nevojshme mjekësore.

Sipas raportimeve, konflikti dyshohet të ketë nisur pasi xhaxhai i kishte treguar babait të 16-vjeçarit se djali i tij konsumonte lëndë narkotike. Kjo, sipas burimeve paraprake, ka shkaktuar një debat mes tyre, i cili më pas ka eskaluar në dhunë.

Gjatë përplasjes, i mituri dyshohet se ka përdorur një mjet prerës, duke plagosur xhaxhain e tij.

Policia ka nisur hetimet për të sqaruar plotësisht rrethanat e ngjarjes, për të dokumentuar dinamikën e konfliktit dhe për të përcaktuar përgjegjësitë ligjore.

Për shkak se rasti përfshin një të mitur, autoritetet nuk kanë bërë publike identitetin e tij, në përputhje me legjislacionin për mbrojtjen e të miturve.

Personi i dyshuar prezumohet i pafajshëm derisa fajësia e tij të provohet me një vendim të formës së prerë të gjykatës.